Туркия шифокорлари мамлакатда маймун чечаги билан боғлиқ илк ҳолатни аниқлади, деб баёнот берди мамлакат соғлиқни сақлаш вазири Фахреттин Кожа.

"Маймун чечаги аниқланган беморнинг ёши 37 да. Унинг иммун тизимида етишмовчилик бор. Бизга маълумки, ушбу касаллик ҳаво-томчи йўли билан эмас, балки жисмоний яқинлик натижасида юқади", – деб ёзди у ижтимоий тармоқдаги саҳифасида.

Маймун чечаги ноёб юқумли инфекция бўлиб, одамлар орасида тарқалади. Одатда у енгил касаллик ҳисобланади ва аксарият беморлар бир неча ҳафтадан кейин тузалиб кетади, лекин айрим одамларда касаллик оғир оқибатларга ҳам олиб келиши мумкин.

Ҳозиргача дунё бўйича 50 дан ортиқ мамлакатда 5,1 мингта ҳолат аниқланган, лекин мутахассислар ҳали ҳам инфекциянинг тарқалиш йўлларини аниқлай олишмаяпти.