Бу ҳақда мамлакат адлия вазири Бекир Боздаг маълум қилди.

Портлаш якшанба куни Истанбул марказидаги Истиқлол майдонида сайёҳлар юрадиган кўчада содир этилган. Туркия Президенти Режеп Таййип Эрдоғаннинг баёнот беришича, теракт қурбонлари сони 6 кишига етган. Кейинчалик Туркия вице-президенти Фуат Оқтой портлаш оқибатида 81 киши жароҳат олганини, ҳукумат портлашни теракт эканини айтиб, хунрезликни аёл киши амалга оширганини таъкидлаган.

"Айни дамда портлашга алоқадорликда гумонланаётган 46 киши ҳибсга олинди", – дея келтиради вазирнинг сўзларини Yeni Şafak газетаси.

Истанбулдаги портлаш ҳақида кўрсатма Суриянинг Кобани шаҳридан берилгани ҳақида маълумот олингани айтилмоқда. Шу сабабли Туркия қуролли кучлари Сурия шимолида ҳарбий амалиёт ўтказиши мумкин, деб ҳисобламоқда Туркиянинг террорчилик ва хавфсизлик бўйича эксперти Абдулла Агар.

Республика ички ишлар вазири Сулейман Сойлунинг таъкидлашича, портлашга кўрсатма Сурия шимолидаги Кобани шаҳридан келган бўлиши мумкин.

"Биз Айн-эль-Арабда (Кобани) ҳарбий амалиёт ўтказамиз. Бу мажбурият энди бизнинг зиммамизда", – дея келтиради унинг сўзларини Miliyyet газетаси.