Туркия Президенти Режеп Таййип Эрдўғон Босфор бўғозини айланиб ўтувчи «Истанбул» канали қурилишини бошлашга бағишланган маросим июнь ойининг сўнгги кунларига режалаштирилган, деб маълум қилди.

«Июнь ойининг сўнгги кунларининг бирида «Истанбул» каналининг қурилишига дастлабки тошни қўямиз. Шубҳасиз ушбу мегалойиҳадан хавотир олаётганлар ҳам бор. Лекин бу бизни тўхтата олмайди», - деди Туркия етакчиси Истанбулда чиқиш қилганида.

Унинг таъкидлашича, «Истанбул» канали лойиҳасининг амалга оширилиши Туркия мегаполисининг стратегик аҳамиятини оширади. «Канал устида олтита кўприк қурилади. Каналнинг икки соҳилида иккита шаҳар қурилади, улар Истанбул кўринишини яна чиройли қилади», - қўшимча қилди Эрдўғон.

Туркия ушбу янги канални Босфор бўғозига параллель равишда бунёд этмоқда у Мармара денгизи билан Қора денгизни боғлайди.

Туркия Президенти ушбу канал ҳақида илк бор 2011 йилда айтган эди. Ўшанда у мамлакат бош вазири эди. Агар ушбу лойиҳа амалга оширилса, у Туркия тарихидаги энг йирик инфратузилмавий ташаббусга айланади, дейилади мазкур хабарда.