Bugun ularni Gebze shahri valesi o‘rinbosari Salomat Guner qabul qildi. U O‘zbekiston – Turkiya munosabatlarini mustahkamlash, savdo aylanmasi hajmini oshirishda Gebze shahri va Farg‘ona viloyati hokimliklarining alohida o‘rni borligini ta’kidladi.

– Shu oyda Gebzelik tadbirkorlar Farg‘ona viloyatida bo‘lib Qo‘qon erkin iqtisodiy zonasida yangi korxona ochish istagini bildirgan edi. Sizlarning tashrifingiz bu amaliy aloqalarni yanada mustaxkamlaydi va kengaytiradi, – dedi Salomat Guner. – O‘zbekistonda ro‘y berayotgan islohotlar to‘g‘ridan-to‘g‘ri investitsiya kiritish imkoniyatlarini osonlashtirdi va biz buni munosib qadrlaymiz. Kelgusi yildan hamkorlikdagi yana bir necha korxonalar tashkil etilishiga ko‘maklashamiz.

– Biz uchun Gebze sanoat zonasi tajribasini o‘rganish juda muhim, – dedi Farg‘ona viloyati hokimi o‘rinbosari Muxsinxo‘ja Abdurahmonov. – Maqsadimiz o‘zaro ishonch asosida zargarlik, qurilish industriyasi kabi bir qator sohalarda ham qo‘shma korxonalar tashkil etishdir.

Shu kuni Gebze savdo-sanoat palatasida yuzga yaqin turk tadbirkorlari bilan uchrashuv bo‘lib o‘tdi. Dastlab Gebze shahri va Farg‘ona viloyati investitsiya imkoniyatlarining videotaqdimoti bo‘lib o‘tdi. So‘ngra Gebze savdo-sanoat palatasi boshqaruvi raisi Nail Chillar va Muxsinxo‘ja Abdurahmonovlar ikki mamlakat tadbirkorlari savollariga javob berdi. Shundan so‘ng ularning yuzma-yuz muloqotlari bo‘lib o‘tdi. Tashrif doirasida bir qator shartnoma va memorandumlar imzolanmoqda.