Украинадаги можарони ҳал қилиш бўйича воситачилик қилиш учун саъй-ҳаракатлар Анқаранинг 2024 йилги ташқи сиёсат мақсадларидан жой олган, шу боис Истанбул тинчлик музокаралари жараёнини қайта йўлга қўйишни таклиф қилади, деб хабар тарқатди “РИА Новости” Анқарадаги дипломатик манбага таяниб.

“Украинадаги можарони ҳал қилиш Туркия ташқи сиёсатида устуворлик касб этади. Жаноб Президент (Режеп Таййип Эрдоған) бир неча бор Туркия ҳар қандай васитачилик ролини, ҳатто Истанбул тинчлик музокарасини қайта тиклаш ва икки мамлакат етакчиларини учраштиришга тайёр эканини таъкидлаган. Жаноб Президент яқинда Украина Президенти Владимир Зеленский билан телефон орқали суҳбатлашганда яна бир бор Анқара воситачилик қилишга тайёр эканини маълум қилган. Бу ҳақда йил бошидан томонларга етказилади”, – деган агентлик билан суҳбатлашган мулозим. 

Москва музокараларга тайёрлигини ҳар доим таъкидлаб келади, бироқ Киев музокара ўтказишни қонун даражасида тақиқлаб қўйган, дейилади хабарда.