Туркия парламенти Швециядан ўтган йил июнь ойида НАТО саммити доирасида имзоланган Мадрид меморандумида кўзда тутилган терроризмга қарши кураш бўйича мажбурияти бажарилишини кутмоқда. Акс ҳолда Анқара бу давлатнинг Шимолий Атлантика альянсига қўшилишини маъқулламайди, деди “TRT” телеканалига берган интервьюсида мамлакат парламенти спикери Нўъмон Қуртулмуш.

“Туркия меморандум мажбурияти алоҳида бажарилишини кутмоқда. Швецияда терроризмга қарши қонун кучга кирганини ижобий қабул қиламиз, аммо ҳужжат ижроси учун аниқ қадамлар керак. Бу Туркиянинг адолатли талаби. Акс ҳолда, биз аризани маъқулламаймиз”, деди спикер.  

Президент Режеп Таййип Эрдоған Стокгольмнинг НАТОга аъзо бўлиш ҳақидаги аризаси маъқулланиши Швецияда 1 июндан кучга кирган террорга қарши қонунчилик амалда қўлланиши билан боғлиқлигини айтган.  

Туркия мудофаа вазири Яшар Гулэр 17 июнь куни Брюсселда НАТО вазирлари йиғилишидан сўнг берган баёнотида Мадридда олган мажбуриятини бажармагунча, Швециянинг аризаси кўриб чиқилмаслигини айтган.  

ЎзА