Туркия мудофаа вазири Хулуси Акар Анқара Россия билан Украина ўртасида юзага келган кескин вазиятни юмшатиш учун саъй-ҳаракатларни давом эттиради, деди.

"Туркия РФ билан Украина ўртасидаги кескинликни юмшатиш учун зарур бўлган барча сиёсий, гуманитар ва ҳуқуқий саъй-ҳаракатларни давом эттиради. Биз ушбу мамлакатлар ўртасида кескинлик дипломатия йўли билан мулоқотлар ёрдамида ҳал этилишини истаймиз", — деди Акар Брюсселда бўлиб ўтган НАТО ташкилотига аъзо мамлакатлар мудофаа вазирларининг учрашувида. Вазирнинг қўшимча қилишича, "Туркия учун Грузиянинг ҳам, Украинанинг ҳам ҳудудий яхлитлиги ва суверенитети муҳим".

Москва билан Киев ўртасидаги кескинлик хусусида тўхталар экан, Акар "ушбу вазият Туркияда ҳам, бошқа мамлакатларда ва НАТОда ҳам хавотир уйғотишини" таъкидлаб ўтди. Шу боис, Анқара кескинликни юмшатиш мақсадида "ўз қарашлари ва таклифларини альянс бўйича иттифоқчилари билан баҳам кўриб келмоқда", деди у.

Туркия РФ ва Украина президентлари Владимир Путин ва Владимир Зеленский ўртасида музокарани ташкил этиш учун ҳаракат қилиб келмоқда. 26 январда Туркия президенти Режеп Таййип Эрдўғон Путинни Туркияга таклиф қилгани ҳақида баёнот берганди. Бундан ташқари, Туркия етакчиси юзага келган вазиятни муҳокама қилиш учун икки мамлакат раҳбарларининг учрашувини ҳам, Туркияда – Россия – Украина иштирокидаги уч томонлама саммитни ҳам ташкил этиш мумкинлигини маълум қилган эди. 8 февраль куни Россия раҳбарининг матбуот котиби Дмитрий Песков РФ президентининг ташрифи бўйича Москва билан Анқара ўртасида келишув борлигини, бироқ аниқ муддати ҳали тасдиқланмаганини маълум қилди.