Туркия энергетика ва табиий захиралар вазири Фотих Донмез TRT Haber телеканалига берган интервьюсида Қора денгизда янги газ ва нефть кони очилиш арафасида эканини маълум қилди. Унинг таъкидлашича, янги конни очиш учун салоҳият етарли.

2020 йилда Туркиянинг Қора денгиз соҳилларида ҳажми 540 миллиард кубметрга баҳоланган газ кони аниқланган эди. Ўшанда Президент Режеп Таййип Эрдоған уни мамлакатнинг энг йирик захираси, деб атади. Шунингдек, у ҳажми 58 миллиард кубметрлик яна бир кон очилганини маълум қилган. Умуман, Туркия етакчиси таъкидлашича, Қора денгизда жами газ захираси 710 миллиард кубметрга етган ва қиймати халқаро бозорда 1 триллион долларни ташкил этади. 

“Қора денгизда катта салоҳият яширинган. Келгусида биз Сакария газ конида иш бошлаймиз. Кейин Қора денгизнинг марказий қисмига ўтамиз”, – деди Донмез TRT Haberга берган интервьюсида.

Аввалроқ Turkish Petroleum (TPAO) нефть корпорацияси бошқарув раиси ва бош директори Мелих Хон Билгин Туркия ҳозирги бозор шароитида Қора денгиз гази билан Европа бозорига чиқиш учун яхши имкониятга эга, деган эди.