Туркия қора денгизда қидирув ва бурғулаш ишларини бошлади
Туркиянинг Fatih бурғулаш кемаси Қора денгизда углеводород конларини топиш мақсадида қидирув-бурғулаш ишларини бошлади.
Туркиянинг Fatih бурғулаш кемаси Қора денгизда углеводород конларини топиш мақсадида қидирув-бурғулаш ишларини бошлади, деди Туркия энергетика ва табиий захиралар вазири Фотиҳ Дёнмез душанба куни.
Бундан аввал Fatih кемаси қидирув ва бурғулаш ишларини Ўртаер денгизининг шарқий қисмида, жумладан Кипр соҳилларига яқин ҳудудларда олиб борган эди.
"Fatih кемаси халқимизнинг дуоси ва мадади билан Қора денгизда дастлабки бурғулаш ишларини бошлади. Туркиянинг энергетик хавфсизлигини таъминлаш учун денгизларимиздаги ҳар бир квадрат метрни тадқиқ қиламиз. Агар бирор нарса бўлса, биз уни албатта топамиз", - деб ёзди Дёнмез Twitterда.
Ўз навбатида, Кипр республикаси ҳукумати Туркия Кипрнинг суверен ҳуқуқини бузаётганини таъкидлаб келади. Жумладан, Кипр томони Анқарани Кипрнинг денгиз ҳудудида бурғулаш ва иқтисодий ҳудудларида сейсмик қидирув ишларини олиб бораётганликда айбламоқда. Европа Иттифоқи ҳам Туркиянинг ушбу ҳаракатларини бир неча бор қоралаган. Туркия эса қидирув ва бурғулаш ишларини тўхтатмаслигини маълум қилган.