Вашингтонда Туркия билан АҚШ ўртасида F-16 қирувчи самолётлари етказиб бериш бўйича музокаралар бўлиб ўтди, деб баёнот берди Туркия мудофаа вазири Хулуси Акар.

Бундан аввалроқ CNN-Turk телеканали Америка томони манбаларига таяниб, АҚШ Қора денгизда НАТО аъзоларини кучайтириш мақсадида Туркиянинг F-16 қирувчи самолётларини сотиб олиш бўйича сўровини маъқуллаши мумкин, деб хабар тарқатган эди.

"F-16 самолётларини етказиб бериш ва мавжудларини модернизация қилиш бўйича расман сўров жўнатилганди. Шундан кейин АҚШга делегация жўнатилди, музокаралар ижобий натижа бермоқда. Биз ўзимизнинг аниқ позициямизни баён қилдик. Бу НАТОни ҳам кучайтиришга имкон беришини тушунтирдик. Агар Туркия кучли бўлса, у НАТО таркибида ҳам кучли бўлади. Кучли Туркия – бу кучли НАТО", - дея келтиради Акар сўзларини Туркиянинг Milliyet газетаси.

АҚШ аввал Анқарага Туркия энг янги F-35 қирувчи самолётларини ишлаб чиқариш дастуридан чиқарилгани ҳақида маълум қилган эди. Бунга Туркиянинг Россияда ишлаб чиқарилган С-400 ҳаво ҳужумига қарши мудофаа тизимини сотиб олгани сабаб қилиб кўрсатилган эди.

АҚШ Туркия билан F-35 бўйича 2007 йил январда имзоланган қўшма меморандумни бекор қилган эди. Туркия президентининг баёнот беришича, АҚШ Туркияни F-35 самолётлари етказиб бериш дастуридан чиқариб юборгандан кейин, унга F-16 самолётларини харид қилишни таклиф этган.