Туркиянинг АҚШ билан F-16 қирувчи самолётларини етказиб бериш масаласида олиб бораётган музокаралари конструктив руҳда, самарали кечмоқда, деб баёнот берди Туркия мудофаа вазири Хулуси Акар.

АҚШ Туркияни Россиядан С-400 ҳаво мудофааси тизимларини сотиб олгани учун энг янги F-35 қирувчи самолёти етказиб бериш дастуридан чиқарган эди. Шунингдек, АҚШ Туркияни F-35 қирувчи самолётларини биргаликда ишлаб чиқариш дастуридан ҳам чиқариб юборди. Мазкур дастурда Буюк Британия, Италия, Нидерландия, Австралия, Дания, Канада ва Норвегия иштирок этмоқда. 

Туркия президентининг баёнот беришича, АҚШ Туркияга энди F-16 қирувчи самолётларини харид қилишни таклиф этмоқда.  

"Биз АҚШ мудофаа вазири Остин билан музокара ўтказдик. Шундан кейин улар Туркияга икки марта делегация жўнатди, мазкур делегациялар бизнинг делегациямиз билан учрашди. Музокаралар жуда яхши ўтди. Америкалик делегациянинг таъкидлашича, бизнинг талабимиз мантиқан ўринли ва улар таклифимизни қўллаб-қувватлайди. Бироқ жараён конгресс назоратидан ўтиши керак, биз ушбу жараённи кузатиб борамиз", – дея келтиради Акарнинг сўзларини CNN Turk телеканали.