Абу-Даби шаҳридаги “Marriott Downtown” меҳмонхонасида Ўзбекистон Республикасининг туризм салоҳиятини БААда тарғиб қилишга масъул “VFS Global” компанияси ва “Wizz Air Abu Dhabi” авиакомпаниялари билан биргаликда Абу-Даби ва Ал Айн шаҳарларида жойлашган сайёҳлик компаниялари учун тарғибот тадбири ташкил этилди.

Ўзбекистоннинг БАА даги элчихонаси ташаббуси билан ўтказилган тадбирда жорий йил 16 январь куни Ўзбекистон ва БАА ҳукуматлари ўртасида кириш виза талабларидан ўзаро озод этиш тўғрисидаги ҳамкорлик протоколининг имзоланиши икки давлат ўртасидаги ҳамкорликни янада мустаҳкамлашда муҳим аҳамият касб этиши таъкидланди.  

Тадбирда иштирок этган 30 га яқин компаниялар учун элчихона ва “VFS Global” компанияси Ўзбекистоннинг туризм салоҳияти, мавжуд имкониятлар, туроператорлар ва турагентлар учун яратилган шароитлар тўғрисида тақдимотлар ўтказди, Ўзбекистонда турли саёҳатларни тарғиб қилувчи видео-роликлар намойиш этилди.  

Тадбир бўлиб ўтган зал Ўзбекистоннинг туризм салоҳиятини тарғиб қилувчи тарқатма материаллар ва миллий либослар кўргазмаси билан жиҳозланиб, юртимиздан келтирилган қуруқ мева ва ширинликлар дастурхонга тортилди. “Wizz Air Abu Dhabi” авиакомпанияси Ўзбекистон бозорида қисқа вақт ичида юқори муваффақиятга эришганлигини таъкидлаб, жорий йилда Ўзбекистоннинг яна бир шаҳрига, 2026 йилга қадар эса умумий 5 та шаҳарга парвозни режалаштираётганини таъкидлади.  

Авиакомпания тежамкор парвозларни амалга ошириши туфайли сайёҳлик агентлари учун алоҳида жорий этилган тизимдан унумли фойдаланиш, шунингдек БААдан Ўзбекистонга сайёҳлик гуруҳларини ташкил этишда авиакомпания тақдим этадиган енгилликлар ҳақида тақдимот ўтказди.  

Тадбир якунида авиакомпания элчихона билан биргаликда Абу Даби ва Тошкент ҳамда Самарқанд шаҳарларига парвоз қилиб, саёҳат қилиш имконини тақдим қилувчи лотерея ўйинларини ўтказиб, ғолиблар (“Liberty Travel Bureau” ва “Aljaraf Travel Tourism”) тақдирланди.  

Мазкур тадбирни Ўзбекистон Туризм қўмитаси билан ҳамкорликда жорий йил баҳор мавсумида маҳаллий сайёҳлик компаниялари учун Тошкент шаҳрида ўтказишга келишиб олинди.  

ЎзА