Бугун Тошкентда футбол бўйича Ўзбекистон чемпионати суперлигаси 12-тур ўйинлари мамлакатимизнинг амалдаги чемпиони “Пахтакор” ва Термизнинг “Сурхон” клублари ўртасидаги баҳс билан якунланади.

Кеча Жиззахда “Сўғдиёна” Қаршининг “Насаф” жамоасини қабул қилди. Ўйин жиззахликларнинг кескин ҳужумлари билан бошланди. Баҳснинг 4-дақиқасида меҳмонлар ўйин қоидасини бузди. Майдон эгалари сардори Жасур Ҳасановнинг узатган жарима зарбасига ҳаммадан баландроқ сакраган “Сўғдиёна”нинг сербиялик легионери Марко Колакович боши билан тўпни қаршиликлар дарвозасига аниқ йўллаб ҳисобни очди – 1:0.  

Тезкор гол ўтказиб юборгандан сўнг “Насаф” футболчилари ҳужумга ташланди. 9-дақиқада бўй борасида мақтана олмайдиган Ойбек Бозоров “Сўғдиёна”нинг баланд бўйли ҳимоячилари орасидан ёриб ўтиб, тўпга боши билан зарба берди ва ўртадаги фарқни йўққа чиқарди – 1:1.  

Биринчи бўлим якунланишига яқин, аниқроғи 37-дақиқада Акмал Мозгавой майдон эгалари дарвозасини ишғол этиб, жамоасини олдинга олиб чиқди – 1:2.

Эътиборлиси, ушбу “Сўғдиёна” – “Насаф” баҳсидаги 3-гол ҳам бош билин киритилганидир.

Учрашувнинг 2-бўлими янада кескин ва шиддатлироқ кечди, аммо ҳар икки жамоа  дарвозаларни бошқа ишғол эта олмади.

Шу куни Наманганда ўтган “Навбаҳор” ҳамда Тошкентнинг “Олимпик” учрашуви ҳам худди шундай, 2:1 ҳисобида, фақат Жиззахдаги баҳсдан фарқли ўлароқ, майдон эгаларининг ғалабаси билан якунига етди.

Мазкур турнинг қолган ўйинларида қуйидаги натижалар қайт этилди:  

ОКМК (Олмалиқ) – “Бухоро” (Бухоро) – 3:1, “Қизилқум (Навоий) – “Нефтчи” (Фарғона) – 1:1, “Андижон” (Андижон) – “Турон” (Яйпан) – 2:1, “Бунёдкор” (Тошкент) – “Металлург” (Бекобод) – 1:1.

Юқорида қайд этганимиздек, “Пахтакор” – “Сурхон” баҳси билан бугун турга якун ясалади.

А.ҚАЮМОВ,  

ЎзА