Номаълум шахслар “Тур де Франc” кўп кунлик шоссе велосипед пойгасида қатнашаётган “Cofidis” жамоаси юк машинасидан 11 та велосипедни ўғирлаб кетишди, дея хабар тарқатди “L'Equipe” нашри.

Манбага кўра, якшанбага ўтар кечаси умумий қиймати қарийб 143 минг еврога тенг спорт транспорти ўмарилган. Ҳодиса Лилл аэродроми яқинидаги Бондю коммунасида пойганинг биринчи босқичидан кейин содир бўлган.

Жиноятчилар яқин атрофда навбатчилик қилаётган қўриқчининг кўзини шамғалат қилиб, жамоа меҳмонхонасидан 150 метр масофада жойлашган юк машиналари устахонасига бостириб кирган.

Воқеа жойига полиция ходимлари эрта тонгда етиб келган.

Ловен-Планкдаги иккинчи босқичда қатнашиш учун “Cofidis” етарли захира велосипедларига эга эди, чунки хизмат кўрсатиш базаси старт чизиғидан атиги 10 дақиқалик ҳудудда жойлашган.

5 июлда бошланган пойга 27 июлгача давом этади.

Лиллдаги биринчи босқич шанба куни “Alpecin-Deceuninck” жамоаси вакили, бельгиялик Яспер Филипсеннинг ғалабаси билан якунланди.

С.Раҳимов, ЎзА