Тошкент вилояти Қибрай туманида навбатдаги экорейд тадбирлари ўтказилди.

Тадбир Ўзбекистон Республикаси Экология ва иқлим ўзгариши миллий қўмитаси ҳамда туман экология бошқармаси мутахассислари иштирокида ташкил этилиб, “Қурилиш” маҳалла фуқаролар йиғини ҳудудида олиб борилди.

Рейд давомида ҳудудда жойлашган иссиқхоналарнинг фаолияти ўрганилди. 

Текширув жараёнида иссиқхоналардан бирида иситиш печига ўрнатилган тозалаш фильтри носоз ҳолатда экани ҳамда амалдаги техник талабларга жавоб бермаслиги аниқланди. Мазкур ҳолат юзасидан иссиқхона эгасига нисбатан белгиланган тартибда баённома расмийлаштирилиб, жарима жазоси қўлланилди.

Шунингдек, ушбу МФЙ ҳудудида жойлашган яна бир иссиқхона ўрганилганда, иситиш печига ўрнатилган тозалаш фильтри умуман ишламаётгани маълум бўлди. Иссиқхона эгаси янги тозалаш фильтри тайёрланаётгани ва уни бир кун муддатда ўрнатишини билдирган. 

Бироқ, мутахассислар мазкур ҳолат қонуний чоралар кўрмаслик учун асос бўла олмаслигини, тозалаш фильтри ишламаган тақдирда иссиқхона фаолиятини давом эттиришга рухсат берилмаслигини тушунтирди.

Натижада, ушбу ҳолат юзасидан ҳам қонунчиликда белгиланган тартибда жарима жазоси қўлланилди.

Мутахассислар тадбиркорларни экологик талабларга қатъий риоя этишга чақирди.

Назорат тадбирлари давом этмоқда.

<iframe width="640" height="420" src="https://www.youtube.com/embed/z_z4Wh8Crvo" title="Tungi ekoreyd: Issiqxonalarda nosoz filtrlar aniqlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ҳамроз Баянов,
Ойбек Давронов (видео), ЎзА