Ўзбекистон Республикаси Миллий гвардияси ҳамда От спорти федерацияси билан ҳамкорликда пойтахтимиздаги "Universal Jumping Agro“ от спорти клубида ҳамда Тошкент вилоятида жойлашган «Ўзбегим отлари от заводи» майдонида ёшлар ўртасида тўсиқлардан сакраш тури бўйича мусобақа ўтказилди.

Тулпорларнинг ажиб «парвози», чавандозларнинг ғайрат ва шижоатга тўла шашти остида ўтган баҳсларда иштирокчилар уч йўналишда ғолиблик учун кураш олиб боришди.

Шиддатли лаҳзаларга бой бўлган тўсиқлардан сакраш жараёнида иштирокчилар бор маҳоратларини намойиш этиб, энг юқори кўрсатгичларни қайд этишди.

Тошкент вилоятида жойлашган «Ўзбегим отлари от заводи» майдонида от пойгаси ва ёшлар учун спорт мусобақалари ташкил этилди.

Мусобақаларда иштирок этиш учун Тошкент вилояти Чирчиқ шаҳрида жойлашган "Меҳрибонлик уйи" тарбияланувчилари, муддатли ҳарбий хизматчилар ва ҳудудий чавандозлар мактаби ўқувчилари таклиф этилди. Спорт тадбирининг байрамона ўтишида Жамоат хавфсизлиги университети оркестр жамоаси ўз ҳиссасини қўшди.

Мазкур масканда от спорти мусобақалари қаторида арқон тортиш, шахмат, шашка, теннис, тош кўтариш каби беллашувлар ҳам ёшларда катта таассурот қолдирди. Жамоат хавфсизлиги университети курсантларининг қўл жанги чиқишлари ўқувчиларда ҳарбий ватанпарварлик руҳини оширишга хизмат қилди.

Ёшларга, тамошабинларга катта завқ бағишлаган баҳсларда Бекзод Рўзмуҳамедов, Сергей Антонович, Алишер Эркинов, Дилшод Шокиров, Элина Акромова каби спортчилар ғолиблик шоҳсупасига кўтарилди. Улар ташкилотчилар томонидан кубок, диплом, медаль ҳамда эсдалик совғалари билан тақдирланди.

Т. Рўзиев, ЎзА