Швециядаги Каролин институти олимлари ген терапияси орқали туғма карликни даволашга муваффақ бўлишди. Бу ҳақда “Euro Pulse” нашри хабар бермоқда.

Ўтказилган клиник синовлар давомида туғма эшитиш нуқсонига эга бўлган 10 нафар беморнинг барчасида эшитиш қобилияти тикланган. Олинган натижалар эса тадқиқотчиларнинг ўзларини ҳам ҳайратга солган.

Тадқиқот туғма карликка сабаб бўлувчи OTOF генидаги мутацияни ўрганишга қаратилган. Олимлар фикрига кўра, ушбу гендаги ўзгариш дунё бўйлаб тахминан 200 минг нафар инсонда эшитиш билан боғлиқ муаммоларни келтириб чиқариши мумкин.

Таъкидланишича, тадқиқотчиларнинг асосий мақсади товуш сигналларининг организмда тўғри узатилишини таъминлашдан иборат бўлган. Шу мақсадда беморларнинг қулоқ қисмига махсус вирус-ташувчи юборилган бўлиб, у керакли генни ҳужайраларга етказиб берган. Бугунги кунда ген терапиясида вируслар касаллик қўзғатувчи эмас, балки бошқариладиган ташувчи восита сифатида қўлланилади.

Тадқиқотда бир ёшли болалардан тортиб катта ёшли беморларгача — жами 10 нафар иштирокчи қатнашган ва уларнинг барчасида ижобий натижа қайд этилган. Манбаларга кўра, айниқса 5–8 ёшли болаларда терапия энг юқори самара берган.

<iframe width="640" height="420" src="https://www.youtube.com/embed/CjpxKklJh2A" title="Tug`ma karlikka davo topildimi? " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ф.Яхшибоева,
У.Тўхтаев (видео), ЎзА