Өзбекстан Республикасы Президенті Шавкат Мирзияевтің шақыруымен Түркіменстан Президенті Сердар Бердімұхамедов 14-15 шілде күндері Өзбекстанға мемлекеттік сапармен келеді.

Жоғары деңгейдегі келіссөздердің күн тәртібінде Өзбекстан мен Түркіменстан арасындағы достық, тату көршілік және стратегиялық серіктестік қатынастарын одан әрі дамыту және нығайту, көпжақты ынтымақтастықты кеңейту мәселелері қаралады.

Негізгі бағыттар бойынша практикалық қарым-қатынастардың келешегі, соның ішінде өзара сауда көлемін ұлғайту, өндірістік кооперацияны орнату, көліктік-транзиттік әлеуетті тиімді пайдалану, су шаруашылығы саласындағы маңызды жобаларды іске асыру, өңіраралық коммуникацияларды жандандыру және мәдени-гуманитарлық алмасу бағдарламаларын жалғастыру мәселелеріне баса назар аударылады.

Мемлекет басшылары халықаралық маңызы бар мәселелер мен өңірлік ынтымақтастықтың өзекті аспектілері бойынша пікір алмасады деп күтілуде.

Саммит соңында бірлескен мәлімдемеге және бірқатар екіжақты құжаттарға қол қою жоспарлануда.

Жоғары мәртебелі мейман Өзбекстан Республикасының Олий Мажлисінде кездесу өткізіп, Самарқанд қаласының көрікті жерлерімен танысуы көзделген.

Осы сапарға дайындық аясында 1-2 шілдеде Ташховуз қаласында су шаруашылығы мәселелері жөніндегі бірлескен үкіметаралық комиссияның іс-шаралары сәтті өтті.

12 шілдеде Ташкентте екіжақты қарым-қатынастарды кеңейту және стратегиялық әріптестік әлеуетін жүзеге асыру мәселелеріне арналған Өзбекстан-Түркіменстан ғылыми-тәжірибелік конференциясы өтті.

Сапар қарсаңында Бұхара қаласында бірінші Өңірлер форумы, Іскерлер кеңесінің отырысы және Өзбекстан мен Түркіменстанның жетекші кәсіпорындарының көрмесі өтуде.