Түркия үкіметі 9 күндік бұғаттаудан кейін кеше, 10 тамызда Instagram желісіне кіруді қалпына келтірді.

Reuters агенттігінің хабарлауынша, компания үкіметтің алаңдаушылығын шешу үшін билікпен ынтымақтасуға келіскеннен кейін әлеуметтік медиа платформасына қолжетімділікті қалпына келтірген.

Басылымның мәліметінше, Түркия ел заңдары мен қоғамдық тәртіпті сақтамағаны үшін әлеуметтік желіге кіруге тыйым салған. Тоғыз күндік тыйым платформа арқылы тұтынушыларымен байланысатын пайдаланушылар мен шағын бизнес өкілдерінің наразылығын тудырды.

Statista платформасының мәліметіне сәйкес, Түркия Instagram желісін қолдану бойынша әлемде Үндістан, АҚШ, Бразилия және Индонезиядан кейін 57 миллионнан астам қолданушысымен бесінші орында тұр.