Түркия президенті Режеп Тайып Ердоған Қара теңізде 75 миллиард текше метр газ қоры анықталғанын мәлімдеді.

«Кеше, 49 күндік бұрғылау және сынақ жұмыстарынан кейін біз Гөктепе-3 кен орнынан 75 миллиард текше метр газ қорын таптық. Бұл көлем еліміздегі барлық отбасыларды үш жарым жыл бойы газбен қамтамасыз етуге жеткілікті. Аталған қордың жалпы құны 30 миллиард долларға бағалануда», — деген Ердоған Ыстамбұлда сөйлеген сөзінде.

Оның айтуынша, қазіргі таңда Қара теңіз газ кен орындары жылына 9,5 миллиард текше метр газ өндіріп, Түркиядағы 4 миллион үйді көгілдір отынмен қамтамасыз етіп отыр. 2028 жылға дейін бұл көрсеткішті 4 есе арттыру жоспарланған.

Еске салайық, 2021 жыл маусымда Ердоған Қара теңізде тағы бір ірі кен орнынан 135 миллиард текше метр газ қоры табылғанын жариялаған еді. Оның айтуынша, осылайша Түркия Қара теңізден жалпы 540 миллиард текше метр газ қорын анықтаған.