Түркияның мәдениет және туризм министрі Мехмет Нури Эрсой мен Өзбекстан Республикасының экология, қоршаған ортаны қорғау және климаттың өзгеруі министрі Азиз Абдухакимов арасында кездесу өтті.

Кездесу соңында «Түркия Республикасының Мәдениет және туризм министрлігі мен Өзбекстан Республикасының Экология, қоршаған ортаны қорғау және климаттың өзгеруі министрлігі арасындағы туризм саласындағы Келісім меморандумы және Іс-қимыл жоспары» құжатына қол қою рәсімі өтті. Онда екі ел арасындағы әуе рейстерінің санын көбейту және туристер ағынын 1 миллион адамға жеткізу көзделген.

– Өзбекстан тарихи және мәдени мұраларымен әлемнің ең маңызды туристік бағыттарының бірі болып табылады. Самарқанд, Бұхара және Хиуа сияқты бірегей қалалар тек Орталық Азияда ғана емес, бүкіл әлемдік мәдени мұраның ажырамас бөлігі саналады. Бұдан бөлек, өзбек тағамдары, дәстүрлі қолөнері және туризм саласындағы ерекше тәжірибесі Өзбекстанның осы саладағы орнын одан әрі нығайтуда, – деді Мехмет Нури Эрсой.

Министр сондай-ақ өткен жылдың маусым айында өткен Жоғары деңгейдегі стратегиялық серіктестік кеңесі аясында туризм саласындағы ортақ мақсаттарды алға жылжытуға бағытталған «Келісім меморандумы» қабылданғанын атап өтті. Сонымен қатар, ол екі ел арасындағы туризм саласындағы ынтымақтастықты арттыру және бірлескен жобалар әзірлеуге ерекше назар аударылатынын жеткізді.

– Екі мемлекетте де туризм саласындағы ынтымақтастықты кеңейту үшін көптеген мүмкіндіктер бар, әрі өзара туризм және мәдениет салаларындағы әріптестік қазіргі таңда ең жоғары деңгейде жалғасуда. Соңғы жылдары елдеріміз арасындағы әуе қатынасының айтарлықтай өскенін байқадық. Болашақта екі елдің де үлесімен бұл өсімді одан әрі жалғастырамыз. Келісімге сәйкес, түрлі қалалардан мақсатты бағыттарға ұшақ рейстерінің санын көбейтеміз, жаңа бағыттарды қосамыз және чартерлік рейстер санын арттырамыз. Осы шаралар туризм саласындағы ынтымақтастықты одан әрі нығайтуға серпін береді деп үміттенемін, – деді Мехмет Нури Эрсой.

Өзбекстан Республикасының экология, қоршаған ортаны қорғау және климаттың өзгеруі министрі Азиз Абдухакимов Түркия мен Өзбекстан арасындағы тарихи бауырластық байланыстардың ежелден бар екенін, туризм екі елдің ортақ мүдделерінің бірі екенін атап өтті. Ол Түркияның туризм тұрғысынан ерекше әрі көркем өлке екенін, оның бұл саладағы жетістіктерін жіті бақылап отырғанын және осы тәжірибенің Өзбекстан туризміне де үлес қосатынына сенетінін жеткізді.

– Бұл Келісім хаттамасы мен Әрекет жоспары біздің нақты қадамдарымызды айқындайтын маңызды құжат. Біз туристік бағыттарды байланыстыратын әуе рейстерін көбейту, Өзбекстанда Түркияның, Түркияда Өзбекстанның туризм әлеуетін кеңінен насихаттау, сондай-ақ Мәтуриди, Нақшбанди және Бұхари тариқаттары өкілдерінің Түркияның орталық және шығыс провинцияларында тұратын ірі қауымдастықтарын (жалпы саны шамамен 3 миллион адам) Өзбекстанға тарту, музейлер арасындағы ынтымақтастықты кеңейту, мәдени іс-шараларды көбейту сияқты бірқатар бастамаларды ұсындық.

Сонымен қатар, «Түрік бауырлар» бағдарламасын жүзеге асыру, елдеріміздің ортақ тарихын терең зерттеу, бірлескен кинотуындылар жасау, Өзбекстанда қарқынды дамып келе жатқан экотуризм, экстремалды туризм, зиярат туризміне арналған тақырыптық көрмелер мен фотокөрмелер өткізу, түркиялық туристер үшін Бұхарадағы «7 пір» зиярат орындарына сапар ұйымдастыру, Түркия музейлерінде Өзбекстан экспонаттарына арналған арнайы бұрыштар ашу мәселелері талқыланды.

Бұдан бөлек, Түркияның ірі мәдениет ошақтары, саябақтары мен орталықтарында ЮНЕСКО-ның материалдық емес мәдени мұралар тізіміне енген өзбек бахшылығы, мақам өнері және лазги биін насихаттайтын мәдени фестивальдер мен «ашық аспан астындағы» іс-шаралар өткізу ұсынылды. Түркия азаматтарына ыңғайлы туристік өнімдер әзірлеу, туроператорлар мен инвесторларды Өзбекстанға тарту, әуежайларда, қонақүйлерде, мейрамханаларда түрік тілінде ақпараттық белгілер орнату, арнайы бағыттар мен экскурсиялар жасау, екі елдің ұлттық тағамдарын біріктірген мейрамханалар ашу, туризм саласындағы тәжірибе алмасу мәселелері де қарастырылды.

Қазіргі уақытта Өзбекстаннан Түркияға 250 мыңнан астам, Түркиядан Өзбекстанға 150 мыңнан астам турист келуде. Бұл біздің әлеуетіміздің жоғары екенін және оны қалай арттыруға болатынын көрсетеді. Осыған байланысты, Түркиядан Өзбекстанға 1 миллион турист, Өзбекстаннан Түркияға 1 миллион турист тартуды мақсат етіп, осы бағытта жұмыс істеуге келістік. Егер осы көрсеткішке қол жеткізсек, мәдени бірлігімізді одан әрі нығайтамыз, – деді Азиз Абдухакимов.

Өз кезегінде, Мехмет Нури Эрсой Өзбекстан тарапынан ұсынылған барлық бастамаларды қолдайтынын мәлімдеді.

Кездесу соңында министрлер Келісім хаттамасы мен Іс-қимыл жоспарына қол қойды.

ӨзА