Куба меҳнат ва ижтимоий таъминот вазири Марта Элена Фейтo-Кабрера парламентдаги чиқишида мамлакатда тиланчилар йўқлигини даъво қилгани учун ишидан айрилди. Бу ҳақда BBC ёзган.

Мулозим Миллий ассамблеяда қуйидаги мазмунда баёнот берган эди:

– Кубада тиланчи йўқ. Кўпчилик ўзини шундай кўрсатиб, осон пул топмоқчи бўлади. Ахлат титувчилар эса ноқонуний қайта ишлов тизими иштирокчиларидир.

Бу фикр жамоатчилик – фаоллар, зиёлиларда кескин норозилик уйғотди.  Халқнинг ғазабини қўзғатган бу сўзлар ортидан Президент Мигель Диас-Канель ҳам бевосита исмини айтмаган ҳолда вазирни танқид қилиб, раҳбарият халқ дардидан айро бўлмаслиги кераклигини таъкидлаган.

Мартанинг истеъфоси Куба Коммунистик партияси ва ҳукумат томонидан қабул қилинди. Иқтисодий таназзул кучайган, озиқ-овқат танқислиги тобора ортаётган бир вақтда ҳукумат вакилининг бундай бефарқ баёноти мамлакат ичи ва ташқарисида “шов-шув”га сабаб бўлди.

Ҳозир расмий рақамлар эълон қилинмаётган бўлса-да, Кубада тиланчилар сони ортиб бораётгани аҳолига аён.

Мусулмон Зиё, ЎзА