АҚШ Президенти Дональд Трамп Украинага янги ёрдам тўплами ажратиш имкониятини кўриб чиқмоқда, деб хабар тарқатди Американинг “CBS News” телеканали ўз сайтида.

“Бу Россияга огоҳлантириш сифатида янграши мумкин”, деб ёзган нашр.

Оқ уй раҳбари лавозимга киришгандан кейин илк бор шундай чорага мурожаат қилиши мумкин.

Гап шундаки, манбалар Трампда ҳамон Жо Байден маъмурияти томонидан ажратилган 3,85 миллиард доллар сақланаётганини айтмоқда. Бундан ташқари АҚШ Киевга ўтказиш учун Россиянинг музлатилган 5 миллиард долларга яқин маблағини мусодара қилишни ҳам ўйлаяпти. Қайд этилишича, Байденда ҳам шундай имконият бўлган, бироқ фойдаланилмаган.

NBC 4 июль куни Киевга ҳарбий ёрдам тўхтатилиши Пентагон раҳбари Пит Хегсетнинг бир томонлама қарори бўлганини ёзди.

Кейинчалик CNN Хегсет Трамп маъмуриятини ўз қароридан хабардор қилмаганини таъкидлади. “Associated Press” эса Пентагон қарори Трампни ҳайратда қолдирганига эътибор қаратди. Кейинроқ Америка етакчиси Киевга ҳарбий ёрдамни тўхтатишга ким рухсат берганини билмаслигини айтди.

С.Раҳимов, ЎзА