АҚШ собиқ Президенти Дональд Трампни Пенсильваниядаги йиғилишда нишонга олган Томас Метью Крукс суиқасд содир этилган куни ишхонасидан бир кунлик таътил сўраган. Бу ҳақда CNN манбаларга таяниб хабар берди.

Крукс раҳбарига “бир юмуши борлигини” айтган ва якшанба куни ишлашга ваъда берган.

Телеканалнинг ҳуқуқ-тартибот идораларидаги манбаларига кўра, Крукс Трамп митингида хавфсизлик назорати ҳудудида бўлган ва дастлаб овчилар масофа ўлчайдиган дурбин кўтариб олганида шубҳа уйғотган. Кимса хавфсизлик ходимлари эътиборини тортган эса-да, бу жиноятчининг текширувдан муваффақиятли ўтишига тўсқинлик қилмаган. Крукс ташқи кондиционердан кўтарилиб, Трампни мўлжалга олиш учун томга чиққан.

Дональд Трампни ўлдирмоқчи бўлган шахс 20 ёшли Томас Метью Круксдир, дейилган Федерал қидирув бюроси баёнотида.

ФҚБ маълумотига кўра, биргина ҳаракати билан дунёга танилган йигит  Пенсильвания штати Байтел-Парк шаҳридан.

Бу шаҳарча суиқасд содир этилган Бутлердан 70 км масофада жойлашган.

Отишмачи ва Трампнинг ўртаси тахминан 130 метрлиги тахмин қилинди.

Ҳужумчи махфий хизмат ходимлари томонидан отиб ўлдирилди.