АҚШ Президенти Дональд Трамп 19 октябрь куни “The Financial Times” нашри келтирган маълумотни инкор этди. Мақолада ёзилишича, гўёки, Трамп Украина Президенти Зеленский билан учрашувда унга Донбассни бутунлай Россияга беришни таклиф қилган ва акс ҳолда, РФ “Украинани йўқ қилиши”ни таъкидлаган.

Аслида, Америка етакчиси Украина – Россия уруши бўйича “ҳозирча айни пайтдаги фронт чизиғида тўхташ” ва кейинги музокарада ҳудудий масалани кўриб чиқиш кераклигини айтган.

Трамп Украинага “Томагавк” ракеталари берилишига рози бўлмаган, бу урушни кескинлаштириши мумкинлигини тахмин қилган. Суҳбатдошлар орасида Россия билан урушни қандай якунлаш юзасидан умумий қараш мавжуд эсада, бунинг учун бирор шартни бажаришга келишилмаган.

Зеленский “NBC News” телеканалига берган интервьюсида Оқ уй ва Кремль раҳбарларининг Будапештда ўтказилиши режалаштирилган музокарасида қатнашишга тайёрлигини маълум қилди. Бу қарор АҚШ етакчиси билан учрашув чоғида ҳам билдирилган. Унинг таъкидлашича, адолатли ва барқарор тинчликни таъминлаш учун музокарада ҳамма томон бўлиши шарт.

Оқ уй матбуот котиби Кэролайн Левитт журналистларга айтишича, Вашингтон Зеленский Будапешт саммитида иштирок этишидан умид қиляпти. Зеро, Трамп 17 октябрь кунги учрашув олдидан “Зеленский Будапештга келмайди, лекин мен у билан алоқада бўламан” – деган.

Мулоқотдан сўнг Трамп ижтимоий тармоқда қуйидаги фикрни қолдирган:

– Россия ва Украина армиялари турган жойида тўхташи керак. Иккови ҳам ғалаба ҳақида эълон қилсин, қолганини тарихнинг ўзи баҳолайди. Етар! Энди уруш, ўлим ва беҳисоб харажат бўлмасин!

Кенжа Бекжонов, Улуғбек Тўхтаев, ЎзА