АҚШ Президенти Дональд Трамп ўтган ҳафта венесуэлалик ҳамкасби Мадуро билан телефон орқали гаплашди, деб хабар тарқатди “New York Times” газетаси.

“хабардор манбалар”га кўра, Трамп ва Мадуро икки томонлама учрашув ташкил этиш ҳақида гаплашган, аммо музокара учун аниқ режа туза олишмаган. Дарвоқе, қўнғироқда Венесуэла раҳбарининг ашаддий танқидчиларидан бири, давлат котиби Рубио ҳам иштирок этган.

Сўнгги ойларда Америка Венесуэлани нишонга олиб, Кариб денгизидаги ҳарбий иштирокини сезиларли даражада оширди. Вашингтон бундан кўзланган мақсад гиёҳванд моддалар савдосига қарши курашиш эканини айтган. Шу билан бирга Мадурони ҳокимиятдан, эҳтимол, куч билан олиб ташлаш истагини ҳам истисно қилмаган.

Октябрь ойида Мадуро АҚШга мамлакат нефть конларида салмоқли улуш, шунингдек Америка компаниялари учун кескинликни юмшатиш бўйича қатор имкониятлар таклиф қилди. Табиийки, у ҳокимиятда қолишга ҳаракат қилади. Шундан кейин АҚШ расмийлари музокарани тўхтатди. Кейинчалик Давлат департаменти Мадурони маъмурият томонидан хорижий террор ташкилоти деб топилган “Cartel de los Soles” раҳбарлари рўйхатига қўшди. 27 ноябрь куни Трамп гиёҳванд моддалар савдогарларини ҳибсга олиш амалиёти қуруқликка кўчишини эълон қилди.

С.Раҳимов, ЎзА