Оқ уй раҳбари Дональд Трамп Венесуэланинг ўтиш даври ҳукумати АҚШга 30–50 миллион баррель юқори сифатли нефть етказиб беришини маълум қилди, деб хабар берди DW.
“Бу нефть бозор нархларида сотилади ва тушган маблағларни АҚШ президенти сифатида, ўзим назорат қиламан. Менинг назоратим Венесуэла халқи ва Қўшма Штатлар манфаатига йўналтирилиш учун кафолат бўлади”, - деб ёзди Америка давлати раҳбари.
Трампнинг айтишича, у АҚШ энергетика вазири Крис Райтга ушбу режани зудлик билан амалга оширишни топширган.
Венесуэла ҳудудидаги нефть дунёдаги энг йирик захиралар ҳисобланади.
2005 йилгача бу мамлакат АҚШ учун энг йирик нефть етказиб берувчи бўлган. Аммо 2007 йилда ўша пайтдаги Венесуэла раҳбари Уго Чавес саноатни миллийлаштириб, жумладан, мамлакатда фаолият юритган Америка компанияларининг мулкларини мусодара қилганидан сўнг вазият тубдан ўзгарди. Ҳарбий операциядан кейин Трамп АҚШ компанияларини Венесуэлага қайта киритишини ва миллиардлаб доллар сарфлаб инфратузилмани тиклашини маълум қилди.
Венесуэланинг вақтинчалик президенти Делси Родригес 6 январь куни телевидение орқали қилган мурожаатида Николас Мадуро АҚШ томонидан қўлга олинганидан кейин Венесуэла ташқи кучлар томонидан бошқарилаётгани ҳақидаги даъволарни рад этди. “Мамлакатимизни Венесуэла ҳукумати бошқаради, бошқа ҳеч ким эмас. Венесуэла устидан бошқарувни амалга ошираётган ҳеч қандай хорижий куч йўқ”, - дея таъкидлади у.
Родригес, шунингдек, мамлакатда АҚШ ҳарбий операцияси қурбонлари хотирасига бағишланган етти кунлик мотам эълон қилинганини билдирди. Венесуэла ҳокимияти маълумотларига кўра, ушбу операция давомида 24 нафар венесуэлалик ҳарбий ҳалок бўлган. Илгарироқ Гавана Венесуэлада хавфсизликни таъминлаш соҳасида хизмат қилган 32 нафар кубалик фуқаронинг ҳалок бўлгани ҳақида хабар берган эди.
<iframe width="650" height="420" src="https://www.youtube.com/embed/SXYVaKmUcN4" title="Tramp: Venesuela AQSHga neft yetkazib beradi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА