АҚШ собиқ Президенти Дональд Трамп Республикачилар партияси янги номзод топгунча маълум муддатга қадар Конгресс Вакиллар палатаси спикери бўлиши мумкинлигини айтди.

Республикачилар мендан спикер лавозимига янги номзод топилгунча, бу лавозимни эгаллаб туришни сўрадилар. Бу мансабга ўз истагим билан бормаяпман. Агар ижобий қарор қилинса, мен зарурат нуқтаи назаридан бу ишни вақтинча бажара оламан, деди у “Fox News” телеканалига.

Трамп “Республикачилар партияси ҳурмати учун “30, 60 ёки 90 кун спикер лавозимини эгаллашим мумкин”, деб таъкидлади.

- Бутун диққат-эътиборим президентлик сайловига қаратилган, - дея қўшимча қилди у.

Аввалроқ “Politico” нашрига кўра, Трампдан спикер лавозимига номзод топишда ёрдам бериши сўралган эди.

Қайд этилишича, ҳали ҳеч қачон Вакиллар палатаси спикери лавозимига Конгресс ташқарисидан вакил сайланмаган. Бундай ҳолат қонун билан тақиқланмагани ҳам айтилган.