АҚШ Президенти Дональд Трампнинг махсус вакили Стив Уиткофф Москвага боради. У Россия Президенти Владимир Путин билан Украина бўйича тинчлик режасининг якуний нусхасини келишиб олиши керак. Шунингдек, Америка армияси вазири Дэниель Дрисколл украинлар билан худди шу масалада Киевда маслаҳат ўтказади. Бу ҳақда Трамп маълум қилган.

– Қўшма Штатлар томонидан ишлаб чиқилган 28 бандли дастлабки тинчлик режаси икки томоннинг қўшимча таклифи билан қайта ишланди, – деб ёзган Оқ уй раҳбари. – Ҳужжатда ҳамон келишмовчиликка сабаб бўлаётган бир неча банд қолди, холос.

Кейинроқ Трамп журналистларга берган интервьюсида АҚШ мулозими Путин билан, эҳтимол, келаси ҳафта учрашишини айтди. Махсус вакилга Президентнинг куёви ва маслаҳатчиси Жаред Кушнер ҳамроҳ бўлиши мумкин. Зеро, Кушнернинг ўзи жараёнда қатнашаётганини билдирган.

Баъзи нашрлар Украина ҳукумати маълумотига таяниб Владимир Зеленский Дональд Трамп билан имкон қадар тезроқ учрашмоқчилигини хабар қилган. Бинобарин, Тинчлик режаси бўйича томонлар бир қарорга келмагунча, учрашув бўлмаслиги ҳам мумкин.

<iframe width="650" height="420" src="https://www.youtube.com/embed/ylIUQ6ORZ8I" title="Tramp vakillari Rossiya va Ukrainaga boradi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА