АҚШ президенти Дональд Трамп ва Украина етакчиси Владимир Зеленский Флорида штатидаги Мар-а-Лаго қароргоҳида мулоқот ўтказди.

Учрашувдан сўнг Трамп томонлар можароларни ҳал қилиш билан боғлиқ масалаларнинг тахминан 95 фоизи бўйича келишиб олганликларини, агар воқеалар ижобий ривожланса, бир неча ҳафта ичида келишувларга эришиш мумкинлигини таъкидлади.

Оқ уй раҳбари шунингдек, келишув жараёнининг бир қисми сифатида Украинага шахсан ташриф буюришга ва Олий Радада нутқ сўзлашга тайёрлигини маълум қилди. Унинг айтишича, асосий қарорлар Украина жамияти томонидан парламент ёки референдум орқали тасдиқланиши керак. Эътиборли жиҳати, Трамп Зеленский ва Путин билан янги музокаралар ўтказиш ниятини тасдиқлади. 

Украина президенти матбуот хизматининг расмий баёнотида сўнгги ҳафталарда Украина ва Америка жамоалари томонидан эришилган “сезиларли ютуқлар” қайд этилган. Зеленский бир қатор ҳужжатлар аллақачон келишиб олинганини, бошқалари эса якуний босқичда эканлигини билдирди. 

С.Раҳимов, ЎзА