АҚШ президенті Дональд Трамп көптеген елдерге енгізілген импорттық баж салығын 90 күнге тоқтатып тұру туралы шешім қабылдады. Оның айтуынша, бұл кезеңде 10 пайыздық тариф күшінде қалады.

Трамп Truth Social әлеуметтік желісінде таратқан хабарламаға сәйкес, Құрама Штаттарға жауап ретінде 84 пайыздық баж енгізген Қытайға қатысты тарифтер бұдан былай тіпті жоғары деңгейге — 104 пайыздан 125 пайызға дейін көтерілетіні айтылды. Бұл шешім бірден күшіне енеді. Трамп Қытайды «әлемдік нарықтарға құрмет көрсетпей отыр» деп айыптады.

Ол 90 күндік жеңілдетілген тарифтер қай елдерге қатысты қолданылатыны жайлы нақты ақпарат берген жоқ. Трамптың сөзінше, бұл елдер АҚШ-пен сауда келісімдері бойынша бейбіт келіссөздер жүргізіп жатқан және «ешқандай түрде АҚШ-қа қарсы әрекет етпейтін» мемлекеттер. Оның айтуынша, осындай келіссөздерді 75-тен астам ел бастап кеткен.

Трамп баж салығын уақытша тоқтату туралы мәлімдеме жасағаннан кейін АҚШ қор биржасының индексі жоғарылаған.

Еске салайық, 2 сәуір күні Трамп әлем елдерінің көпшілігіне қатысты баж салығын енгізетінін жариялап, бұл күнді «Америка еркіндігі күні» деп атаған болатын. Оның айтуынша, «он жылдар бойы» АҚШ өзге мемлекеттерге сауда тосқауылдарын азайтып келген, ал бұл елдер, керісінше, америкалық өнімдерге «негізсіз жоғары тарифтер» енгізген.

Трамптың бұл әрекеттеріне жауап ретінде бірқатар мемлекеттер АҚШ өнімдеріне баж салығын көтеретінін мәлімдеді. Атап айтқанда, Қытай АҚШ-тан әкелінетін барлық өнімдерге бажды 84 пайызға дейін ұлғайтты.

Ал Еуропа одағы «темекі, мотоциклдер, құс еті, болат және алюминий» секілді бірқатар америкалық тауарларға 10 пайыздан 25 пайызға дейін тариф енгізу жөнінде келісімге келді.