АҚШ президенти Дональд Трамп журналистлар билан суҳбатда агар Украина бўйича келишувга амин бўлса, Россия раҳбари Владимир Путин билан учрашишга тайёр эканлигини билдирди.

Бундан ташқари, у Си Цзиньпин билан Хитойнинг РФдан нефть импортини камайтириш масаласини муҳокама қилмоқчи.

“Reuters” нашри ёзишича, Трамп маъмурияти Россия иқтисодиётининг асосий тармоқларига қарши янги санкцияларни тайёрлаган. Агар Москва зиддиятни тугатишга рози бўлмаса, “жазо” жорий этилади. 

Хабарда келтирилишича, баъзи чекловлар РФ банк секторига ва нефть етказиб бериш учун ишлатиладиган инфратузилмага қаратилган. Трамп кейинги бир неча ҳафта давомида “танаффус” қилишни ва Россиянинг “Лукойл” ҳамда “Роснефть”га қўлланилган санкцияларни синчиклаб текширмоқчи.

Бундан ташқари, АҚШ расмийлари Европа Иттифоқига блокланган Россия активларидан Украина учун қурол сотиб олиш ғоясини қўллаб-қувватлашлари ҳақида маълум қилишган. 

АҚШ молия вазири Скотт Бесцент “CBS News” телеканалига берган интервьюсида РФ етакчисининг махсус вакили Кирилл Дмитриевни “санкциялар таъсири ҳақида ёлғон гапирадиган тарғиботчи” деб атади. 

Бесцент Дмитриевнинг “санкцияларнинг фойдасизлиги” ҳақидаги даъволари ҳақиқатга тўғри келмаслигини айтиб, Россия аллақачон таъсирни ҳис қилмоқда - Ҳиндистон нефть сотиб олишни тўхтатди ва Хитой ҳам харидни қисқартирган, деди.

С.Раҳимов, ЎзА