АҚШ президенти Дональд Трамп агарда Эрон ядровий дастурини тиклаш ёки ҳарбий қудратини оширишга ҳаракат қилса, Вашингтон ҳарбий зарбалар беришга тайёр эканини очиқ билдирди, деб хабар берди DW агентлиги.

Трампнинг бу баёноти Эронда иқтисодий инқироз кучайиб, аҳоли норозиликлари ортаётган бир пайтга тўғри келди. Шу ўринда воқеаларнинг бир-бирига боғликлик томонлари борми, деган савол туғилади. Назаримизда, баёнотнинг Эрондаги норозиликларга боғликлик томони йўқ, чунки Трампнинг бу гаплари Исроил бош вазири Биньямин Нетаньяҳу билан учрашувидан сўнг эълон қилинди. Чунки, Исроил Эроннинг узоқ масофага учувчи баллистик ракеталар захирасини тиклаши мумкинлигидан хавотирда.  

Шу суҳбатдан сўнг, АҚШ президенти ҳозирча Эрон томонидан ядровий ёки ракета дастури қайта бошланганини тасдиқловчи аниқ далиллар йўқлигини маълум қилиб, Вашингтон Теҳрон билан икки томонлама музокараларга ҳам очиқ эканини билдирган.

Эслатиб ўтиш жоизки, 2025 йил июнь ойида АҚШ Эрон ядровий объектларига зарбалар берган эди. Ўша пайтда Трамп Эроннинг ядровий дастури “тўлиқ ва батамом йўқ қилинганини” таъкидлаган. Бироқ The New York Times нашри хабар беришича, зарбалардан олдин Теҳрон бойитилган ураннинг катта қисмини кўчириб улгурган. Эрон расмийлари эса мамлакатда ядровий уран бойитилаётганини қатъиян рад этиб келмоқда.

Эрон нашрлари мамлакатнинг турли вилоятларида янги ракеталар синовини ўтказиш ҳақида хабарлар тарқатган. 

Эрон Ташқи ишлар вазирлигининг расмий вакили Исмоил Бағоий эса бу ракеталар фақат ташқи тажовузларни тийиш ва мамлакат ҳудудий яхлитлигини ҳимоя қилиш мақсадида ривожлантирилмоқда.

Нетаньяҳу билан учрашув чоғида Трамп, агар Эрон баллистик ракеталар ишлаб чиқаришни давом эттирса, Исроил томонидан зарба бериш имкониятини қўллаб-қувватлашини очиқлади.

Муттахассисларнинг фикрича, Трампнинг таҳдиди “тўсатдан” пайдо бўлмади. Бу АҚШ томонидан Эроннинг ядровий дастури ва ракета салоҳиятига қарши Исроил билан стратегик ва сиёсий ҳамкорлик белгиси. Уларнинг мақсади, Эронни ядровий салоҳиятини оширишдан тийиш бўлиб қолмоқда.  

<iframe width="650" height="420" src="https://www.youtube.com/embed/P7tXCiowDqY" title="Tramp nega Eronga  tahdidlar bilan chiqyapti?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжанов, Анвархўжа Аҳмедов, ЎзА