АҚШ собиқ Президенти Дональд Трамп 2021 йил январида Капитолия ҳудудидаги тартибсизлик бўйича ўзига қўйилган айблов хулосасини сиёсий ҳаракат, деб атади.

– Эътибор берилса, гап сиёсий рақибнинг таъқиб қилиниши ҳақида кетаётганини англаш мумкин, – деди Трамп Рональд Рейган номидаги аэропортда журналистлар билан ўтказилган суҳбатда. – Бундай ҳолат Америкада ҳеч қачон содир бўлмаслиги керак эди. Таъқиб 2024 йил ўтадиган президентлик сайловида иштирок этиш ниятида бўлган Республикачилар партияси номзодлари ичидаги рейтинги энг баланд, рейтингда амалдаги Президент Жо Байдендан бироз илгарилаб кетаётган номзодга қаратилган. Сиз уни мағлуб эта олмас экансиз-ки, жиноий жавобгарликка ёки судга тортмоқдасиз. Америкада бунга йўл қўйиб бўлмайди.

Трамп, шунингдек, “бугун Америка учун жуда қайғули кун” эканини таъкидлади.

– Вашингтон бўйлаб машинада юриб, жирканч, чириётган, вайрон бўлган бинолар, деворлардаги граффитиларни кўриш жуда ачинарли, – деди у. – Мен ўзимдан кейин шаҳарни бу ҳолда ташлаб кетмагандим. Нохуш манзара.

1 август куни АҚШ махсус прокурори Жек Смит Трампга қарши айблов хулосасини эълон қилади. Собиқ президент, аслида, 2020 йил ноябрда бўлиб ўтган сайловда мағлуб бўлганига қарамай, ҳокимиятни ноқонуний равишда сақлаб қолишга уринишда айбланмоқда. Кеча, 3 август куни Трамп ўзига қўйилган айбларни тан олмаслигини эълон қилди. Прокуратура вакили энди АҚШ расмийлари томонидан собиқ президентни ҳибсга олиш талаб қилинмаслигини тасдиқлади.