АҚШ Президенти Дональд Трамп яна бир бор Хитойга нисбатан кенг кўламли бож жорий этилиши билан таҳдид қилди. У Пекинни АҚШ саноати учун зарур ноёб моддалар экспортини чеклашда айбламоқда. Бу ҳақда “The Guardian” хабар берган.
Таъкидланишича, айни мазмундаги баёнотдан сўнг Америка фонд бозори кескин сустлашган. Ёзда Вашингтон ва Пекин муносабати бироз яхшиланиб, Трамп бир неча музокарадан сўнг аввал жорий этилган юқори тарифларни сезиларли даражада камайтиришга рози бўлган эди. Куни кеча эса АҚШ раҳбари ижтимоий тармоқ орқали вазиятга нисбатан норозилик билдирди. Унинг сўзларига кўра, Оқ уйда Хитойдан АҚШга келаётган маҳсулотларга божни ошириш ва бошқа жавоб чоралари кўриб чиқиляпти.
Шунингдек, Трамп ХХР Раиси Си Цзиньпин билан Жанубий Кореяда режалаштирилган учрашув бекор бўлиши эҳтимолини билдириб, музокара учун “сабаб кўрмаётгани”ни айтган. Ёдингизда бўлса, бор-йўғи тўрт ой олдин АҚШ Президенти Хитой билан муносабатни “зўр” деб атаган ва бож пасайтирилиши тўғрисидаги келишувни имзолаган. Баҳорда эса Вашингтон Хитой товарларига солиқни 145 фоизгача кўтарган, бунга жавобан Хитой ҳам тарифни 125 фоизга чиқарган эди. Кейинчалик томонлар ўзаро келишди ва АҚШда 30, Хитойда 10 фоиз тўлов белгиланди.
Трампни ўйлантираётган жиҳат шуки, бугунги кунда АҚШ саноати Хитойда қайта ишланадиган ноёб унсурларга жиддий муҳтожлик сезмоқда. Зеро, Чин мамлакати дунё бўйича қайта ишланадиган ноёб элементлар ва шундай моддалардан олинадиган оҳанрабонинг 90 фоизидан кўпини ишлаб чиқаради. 17 хил бу унсурлар электромобиль, авиация двигатели каби юқори технологияли маҳсулотлар ишлаб чиқаришда жуда муҳим саналади.
Пекин жорий ҳафта экспорт назоратини янада кучайтириши ҳам Трампнинг Хитойга таҳдидига сабаб бўлди.
<iframe width="650" height="420" src="https://www.youtube.com/embed/erlmXeoFVg0" title="TrampXitoyga tahdid qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА