АҚШ президенти Дональд Трамп Ҳиндистонга нисбатан 25 фоизлик бож тўловларини жорий этишини маълум қилди. Нега дейсизми? Трампнинг айтишича, Ҳиндистон АҚШ санкцияларига зид равишда Россиядан нефть ва ҳарбий техника харид қилган.

– Шуни ёдда тутишимиз керакки, Ҳиндистон бизга дўст ўлка бўлса-да, улар билан савдо алоқаларимиз йиллар давомида жуда ҳам ривожланиб кетмади, -деди Қўшма Штатлар етакчиси ўз баёнотида. – Сабаби улар томонидан жуда юқори тарифлар қўлланилади, ҳатто дунёдаги энг баланд тарифлар дейишимиз мумкин.

“Times of India” нашри маълумотларига кўра, Ҳиндистон хом нефть импортининг тахминан 35 фоизини Россиядан олади. 2025 йил июнь ойида бу кўрсаткич сўнгги икки йил ичидаги энг юқори даражага етган.

Айни пайтда АҚШ Украинадаги зиддият сабабли Россиянинг нефть ишлаб чиқарувчилари ва ташувчи флотига нисбатан қаттиқ санкциялар жорий қилган. Ҳиндистон эса АҚШнинг бу санкцияларини қўллаб-қувватламасдан, Москва билан яқин муносабатларни сақлаб келмоқда. Бундан ташқари, Ҳиндистон Россиядан 80 миллиард доллар қийматидаги ҳарбий техника - қирувчи самолётлар, ракета тизимлари, сувости кемалари ва вертолётларни харид қилган.

Трамп ўз баёнотида Ҳиндистонни “ҳарбий жиҳозларининг катта қисмини Россиядан сотиб олганликда” ва “РФнинг энг йирик энергия харидорларидан бири” сифатида танқид қилган. Трампга ёқмаётган яна бир ҳолат, Ҳиндистон ва Россиянинг дўстона алоқалари дейишимиз мумкин. Чунки ҳиндлар Москвага қарши АҚШ ва Ғарбнинг санкцияларини қўллаб-қувватламади. 

Сешанба куни Трамп Кремльга Киев билан низони тўхтатиш учун берган 50 кунлик муддатни 10 кунга туширди. Агар шу муддат ичида талаб бажарилмаса, Россияга қарши янги санкциялар билан таҳдид қилди.

<iframe width="650" height="420" src="https://www.youtube.com/embed/2Qdlt6U_vK8" title="Tramp Hindistonni “jazolamoqchi”" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов,ЎзА