АҚШ Президенти Дональд Трамп Эронга қарши ўтказилган ҳарбий амалиётни самарали, деб баҳолаб, ушбу ҳаракат натижасида Олий Раҳбар Али Ҳумонаий ҳалок бўлгани, юз берган воқеалардан сўнг Вашингтон учун Теҳрон билан келишувга эришиш имконияти анча ошганини билдирди.

"CBS News" телеканалига берган интервьюсида Трамп музокарани ҳозир амалга ошириш аввалги кунларга нисбатан осонроқ бўлишини таъкидлади. Унинг сўзларига кўра, Эрон жиддий мағлубиятга учраган. Америка етакчиси шанба куни амалга оширилган ҳужумни "мамлакат ва бутун дунё учун муҳим кун" деб атади. 

Шу билан бирга, Эроннинг эҳтимолий жавоб ҳаракати билан боғлиқ вазият диққат билан кузатилаётганини айтди. Таъкидланишича, амалга оширилган жавоб зарбаси АҚШ ва иттифоқчилар кутганидан кучсизроқ бўлган. "United States Central Command" маълумотига кўра, Эрон ҳудудидаги амалиёт чоғида америкалик ҳарбийлар орасида ҳалок бўлганлар ёки жароҳатланганлар қайд этилмаган. 

Исроилга жавоб ҳужуми натижасида бир киши ҳалок бўлган, ўнлаб одам жароҳат олган. Абу-Дабида ҳам бир нафар қурбон бор. "Red Crescent Society of Iran" эса Эронга ҳужумлар оқибатида 200 нафардан кўп одам ҳалок бўлганини маълум қилди. 

Ф.Яхшибоева, ЎзА