АҚШ президенти Дональд Трамп Эронга қарши бошланган ҳарбий амалиёт камида яна тўрт ҳафта давом этиши мумкинлигини билдирди. Бу ҳақда у Daily Mail нашрига берган интервьюсида маълум қилди. Суҳбат 1 март, якшанба куни эълон қилинган.

Трампнинг таъкидлашича, операция режа асосида олиб борилмоқда ва вазият тўлиқ назорат остида. У АҚШ Эрон раҳбариятининг юқори бўғинига жиддий зарба берганини даъво қилди.  

Шу билан бирга, Оқ уй раҳбари Эрон билан қўшимча музокаралар ўтказиш имкониятини ҳам истисно қилмади. Бироқ бундай мулоқот қачон амалга ошиши ҳақида аниқ айта олмаслигини билдирди.

1 март куни Дональд Трамп Америка халқига яна мурожаат қилди. У ҳалок бўлган уч нафар америкалик ҳарбий учун қасос олишга сўз берди, Теҳронга янги ультиматум йўллади ҳамда фуқароларни эркинлик учун курашда бирлашишга чақирди. Daily Mail’нинг қайд этишича, бу Трампнинг сўнгги 48 соат ичидаги иккинчи расмий мурожаати бўлди.

Аввалроқ, The Atlantic нашрига берган интервьюсида Эрон ҳукуматини музокаралар борасида сусткашликда айблаган эди. Унинг айтишича, сўнгги ҳафталарда Вашингтон алоқа қилган айрим эронлик музокарачилар ҳаво зарбалари оқибатида ҳалок бўлган.  

28 февраль тонгида Исроил ва Қўшма Штатлар Теҳрон ҳамда Эроннинг бошқа ҳудудларига зарба берди. Трамп бу ҳаракатлардан мақсад Ислом Республикасининг ядровий дастурини йўқ қилиш эканини маълум қилди. Шунингдек, у Эрон армиясини қуролни ташлашга, мамлакат аҳолисини эса вазиятни ўз қўлига олишга чақирди.

Эрон эса жавоб тариқасида Исроил ва Яқин Шарқдаги бошқа давлатлар ҳудудига зарбалар берди. Бироқ 1 март куни берилган янги маълумотга кўра, мазкур зарбалар оқибатида АҚШнинг уч нафар ҳарбийси ҳалок бўлган, яна беш нафари оғир яраланган.

Шу билан бирга, Исроил–Америка ҳарбий амалиётининг иккинчи куни Эрон томони зарбалар натижасида мамлакат олий раҳбари Оятуллоҳ Али Ҳумонаий, шунингдек бир қатор юқори лавозимли ҳарбий тузилмалар вакиллари, жумладан мудофаа вазири Азиз Носирзода ҳамда Ислом инқилоби қўриқчилари корпуси қўмондони Муҳаммад Покпур ҳалок бўлганини тасдиқлади.

Ҳозирча вазият кескинлигича қолмоқда. Расмий баёнотлар ва ҳарбий ҳаракатлар минтақадаги хавфсизлик муҳити янада мураккаблашганини кўрсатмоқда.

<iframe width="650" height="420" src="https://www.youtube.com/embed/w4iTy4m-ROE" title="Tramp: Erondagi harbiy operatsiya to‘rt haftagacha davom etishi mumkin" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов,  ЎзА