АҚШ Президенти Дональд Трамп Эронда кескинлик давом этаётган бир пайт Теҳрон билан дипломатик алоқа ўрнатиш истагини билдирди.

Хусусан, минтақага Америка ҳарбий кучлари жойлаштирилиши муносабати билан юзага келган вазият ҳақида журналистларга изоҳ бераркан, у Вашингтон Ислом Республикаси билан музокара ўтказишни режалаштираётганини эълон қилди.

Бинобарин, Пентагон АҚШ ҳарбийлари Президент қабул қиладиган ҳар қандай қарорни амалга оширишга тайёрлигини таъкидлаган.

Ушбу баёнотлар янграши шароитида Туркия Вашингтон ва Теҳрон ўртасида воситачилик қилиш учун дипломатик саъй-ҳаракатни кучайтирди.

Таъкидланишича, Анқара Эронга қарши ҳар қандай ҳарбий аралашувга қарши эканини яна бир бор тасдиқлаб, мулоқот орқали кескинликни камайтиришга ёрдам беришга тайёр.

Туркия ташқи ишлар вазири Ҳоқон Фидан АҚШнинг Анқарадаги элчиси, Сурия бўйича махсус вакил Том Барак билан учрашган.

Турк оммавий ахборот воситалари Президент Режеп Таййип Эрдоған Трампга вазиятни юмшатиш учун Эрон раҳбарияти билан уч томонлама маслаҳатлашув масаласини кўриб чиқиш таклифини бергани ҳақида ёзди.

Вашингтон эса айни мавзуда эҳтимолий қадамлар бўйича ҳали якуний қарор қабул қилинмагани,турли дипломатик ва ҳарбий вариантлар кўриб чиқилаётганига урғу берган.

Трамп яқинда Эрон билан келишувга эришиш вақти тугаб бораётганини айтиб, АҚШнинг бу галги зарбаси 2025 йил июнь ойидаги ҳужумга нисбатан анча жиддий бўлишидан огоҳлантирди.

Г.Сатторова, ЎзА