АҚШ Президенти Европа Иттифоқини Хитой ва Ҳиндистондан импорт қилинадиган маҳсулотларга 100 фоизгача бож қўйишга чақирди.

Дональд Трамп бундай чора Россияни Украина билан урушни тўхтатишга мажбур қилишини таъкидлаган.

BBС хабарига кўра, бу таклиф ЕИ расмийлари билан Россияга иқтисодий босимни кучайтириш масаласига бағишланган учрашувда билдирилган.

Маълумки, РФ ҳужуми сўнгги кунларда кескин кучайди. Дам олиш кунлари Киевдаги ҳукумат биносига ракета тушди, Донбассда нафақа олиш учун навбатда турган 20 дан зиёд бегуноҳ одам ҳалок бўлди.

Украина охирги бир неча кун ичида 810 дрон ва 13 ракета учирилганини маълум қилди. Трамп бу ҳужумлардан сўнг “вазиятдан норози”лигини билдириб, Кремлга қарши янада оғирроқ санкция қўллаш билан таҳдид қилди.

Ўтган ой Аляскада ўтказилган саммит натижа бергани йўқ. АҚШ молия вазири Скотт Бессент Вашингтон иқтисодий чорани кучайтиришга тайёр тургани, бироқ бунга Европанинг фаолроқ қўллови зарурлигини қайд этди.

Қўшма Штатлар етакчиси Ҳиндистон билан савдо музокараси давом этаётганини ҳам эслатиб, тез орада Бош вазир Нарендра Моди билан суҳбатлашмоқчилиги, ўз навбатида Моди ҳам мулоқотдан “муваффақиятли якун” кутаётганига урғу берди.

Дарвоқе, Хитой ва Ҳиндистон Россия нефтининг асосий харидори сифатида руслар иқтисодиётини қўллаб турибди. Шу боис АҚШ яқинда Ҳиндистондан кириб бораётган маҳсулотларга 50 фоиз солиқ жорий қилди.

ЕИ эса РФ газига қарамлик тугатилишини айтган бўлса-да, ҳозирча кўҳна қитъа импортининг қарийб 19 фоизи Россияга тўғри келмоқда.

Демак, Трамп таклифини қабул қилиш ЕИ санкциядан савдо чекловига ўтишини англатади.

Мусулмон Зиё, ЎзА