Бугун АҚШ собиқ Президенти Дональд Трамп ва Украина етакчиси Владимир Зеленский ўртасида телефон мулоқоти ташкил этилиши мумкин. Бу ҳақда CNN хабар берди.

Трамп ва Зеленский суҳбати учун мос сана ҳақидаги мунозара анча давом этди. Манбалардан бири аниқлик киритишича, қўнғироқ вақти ҳалиям ўзгариши эҳтимоли бор.

Мазкур сўзлашув икки сиёсатчининг Трамп Оқ уйни тарк этгандан кейинги илк суҳбати бўлади.

“Интерфакс” ахбороти эса қуйидаги мазмунда ифодаланган:

– Мулоқот собиқ Президентнинг сайловдаги эҳтимолий ғалабасидан кейин Трамп Украинага нисбатан бошқача сиёсат олиб бориши мумкинлиги ҳақидаги хавотир асносида ташкил этилмоқда. Америка собиқ раҳбари Украинадаги вазиятни бир кунда ҳал қила олишини бир неча бор таъкидлаган.

Ўтган ҳафта Трамп Венгрия Бош вазири Виктор Орбан билан учрашган. Музокарадан сўнг Орбан Европа етакчиларига Трамп Россия ва Украина ўртасида “тинчлик учун воситачилик қилишга тайёр”лигини очиқлаган.