Уруғчиликни ривожлантириш марказига Тожикистон Республикасининг Ўзбекистондаги элчихонаси, Тожикистон ҳукумати вакиллари ҳамда тожикистонлик тадбиркор ва фермерлардан иборат делегация аъзолари ташриф буюрди.

Учрашувда Тожикистон вакиллари жорий йил экиш учун Ўзбекистондан чигитнинг "Султон" ва "Бухоро 102" навларини импорт қилиш бўйича шартнома таклиф қилди. Келгуси йилда эса ушбу навларнинг 10 минг тоннагача уруғлигини импорт қилиш режалаштирилгани айтиб ўтилди. 

Шунингдек, ҳамкорларга мамлакатимизда маҳаллий навларнинг касаллик ва зараркунандаларга қарши, гербицидга чидамлилик хусусиятини ошириш бўйича илмий тадқиқотлар олиб борилаётгани ва Bt технологиясини қўллаш орқали ҳосилдорликни оширишга эришилиши ҳақида маълумот берилди.

Якунда фойдали келишувларга эришилди.

Гулноза Бобоева, ЎзА