Тожикистонда коронавирусга чалинганлар 3 минг кишидан ошди
Тожикистон соғлиқни сақлаш вазирлиги матбуот хизматидан маълум қилинишича, коронавирусга чалинганлар сони душанба куни 3 минг 100 кишини ташкил этган.
Тожикистон соғлиқни сақлаш вазирлиги матбуот хизматидан маълум қилинишича, коронавирусга чалинганлар сони душанба куни 3 минг 100 кишини ташкил этган. Бир суткада 171 кишининг вирус юқтиргани аниқланган.
“Коронавирус туфайли вафот этганлар сони ҳозиргача 46 кишини ташкил этмоқда“, — дейди матбуот хизмати вакили. Унинг айтишича, вирус юқтирганларнинг 1 минг 395 нафари соғайган.
Вазирлик тарқатган хабарда айтилишича, ҳозирда 2 минг 773 бемор касалхоналарда тиббий назоратда сақланмоқда, кеча 232 беморга уйига кетишга рухсат берилган.
Хабарда COVID-19 билан хасталанган беморларни даволаш учун 7,5 минг врач ҳамда 25 минг ҳамшира жалб этилгани айтилмоқда.
Жаҳон соғлиқни сақлаш ташкилотининг сўнгги маълумотларига кўра, ҳозир дунёда коронавирусга чалинганлар сони 5,2 миллион кишидан ошган, 337 мингдан зиёд бемор касаллик қурбони бўлди.