Куни кеча бўлиб ўтган Тожикистон билан Жанубий Корея ўртасида савдо-иқтисодий ҳамкорлик бўйича ҳукуматлараро комиссиянинг мажлисида Тожикистон келгуси беш йилда Жанубий Корея инвестицияси учун устувор мамлакатлар рўйхатига киритилгани маълум қилинди. Хабарда таъкидланишича, икки мамлакат ўртасида ҳамкорлик барқарор ривожланмоқда.

Корея халқаро ҳамкорлик бўйича агентлик президенти Сон Хюк-Санг билан Тожикистон иқтисодий ривожланиш ва савдо вазири Завқи Завқизода учрашувида Тожикистондаги лойиҳаларни молиялаштиришда Жанубий Корея томонини фаолроқ жалб қилиш ҳамда миллий иқтисоднинг устувор йўналишларида амалга оширилаётган лойиҳаларни қўллаб-қувватлаш таклифи берилган.

Музокараларда икки мамлакатнинг савдо-инвестиция имкониятлари тўлалигича ишга солинмаётгани қайд этилган. Шунингдек, мулоқот давомида икки томонлама савдо айланмасини ошириш ва Корея Республикаси капитали ҳамда технологияларини жалб қилиш бўйича яқинда имзоланган меморандумни бажариш лозимлиги таъкидланган.