Тожикистон Миллий университетида Бухоро давлат университети билан ҳамкорликда “Тожикистон ва Ўзбекистон ёшлари дўстлиги абадий бўлсин” номли маданий тадбир ташкил этилди. Тадбирда Бухоро давлат университетининг санъат факультети декани Санжар Азимов бошчилигидаги жамоа иштирок этди.

Тожикистон Миллий университети ректори, профессор Қобилжон Хушвахтзода сўзга чиқиб, меҳмонларнинг ташрифидан мамнунлигини билдирди. Тожикистон ва Ўзбекистон ўртасидаги турли шериклик алоқаларини ривожлантириш ва тожик-ўзбек халқлари ёшларининг дўстлигини мустаҳкамлаш мақсадида бундай тадбирларнинг ўтказилишини юқори баҳолади. Шунингдек, тадбирда тожик-ўзбек халқлари ўртасидаги дўстлик илдизлари узоқ асрларга бориб тақалиши, улар ўртасидаги дўстлик ва яхши қўшничилик муносабатлари мустаҳкам эканлиги таъкидланди.    

Ҳамкорликда тайёрланган маданий дастур намойиш этилди. Тадбирда янграган икки халқнинг муштарак куй-қўшиқлари, миллий рақслари иштирокчиларда катта таассурот қолдирди.  

Зуҳриддин Умаров, ЎзА