Тожикистон «Северный ветер» ва S7 Airlines авиакомпаниялари парвозларига берилган рухсатни тўхтатиб қўйди, дейилади РИА Новостининг мамлакат фуқаро авиацияси агентлиги берган маълумотига таяниб тарқатган хабарида.

«Ушбу авиакомпанияларнинг фаолияти Россия йўналиши бўйлаб амалга оширилаётган парвозларда чипта нархлари ошириб юборилгани учун тақиқланди. Агентлигимиз нарх чегарасини мунтазам қатновлар учун 500 доллар қилиб белгилаб қўйган бир пайтда, ушбу компаниялар чипта нархларини 1200 долларгача ошириб юборган», — дейди агентлик вакили РИА Новостига.

12 майдан буён ушбу авиакомпания мижозлари харид қилган чипталари билан Душанбе ва Хўжанд аэропортларидан учиб кета олмаяпти, дейилади агентлик тарқатган маълумотда.

S7 матбуот хизмати ушбу вазиятга изоҳ берар экан, компания ҳақиқатан ҳам парвозга рухсат олиш бўйича қийинчиликларга учраганини маълум қилган. Шунингдек матбуот хизматининг таъкидлашича, компания раҳбарияти тез кунларда ушбу қийинчиликларни амалий тартибда ҳал қилишни мўлжалламоқда.