"Авеста" агентлигининг ёзишича, пахта толаси экспорти жорий йилнинг биринчи чорагида 52,6 миллион долларни ташкил этган.

Бу ўтган йилнинг шу давридаги кўрсаткичдан 43,9 фоизга ёки 16 миллион долларга кўп.

Электрэнергия экспорти эса ушбу даврда 9,7 миллион доллардан ошган. Ўсиш 42,8 фоизни ёки 2,9 миллион долларни ташкил этган.

Мутахассислар ушбу маҳсулотларнинг экспорти ошганини маъқуллар экан, лекин пахта толасининг экспортига шубҳа билан қарашмоқда, чунки Тожикистон пахтасининг 75 фоизидан ортиғи хомашё кўринишида сотилади.

Тожикистон ўзи пахта етиштиради, хомашё хорижга сотилади ва ўз пахтасидан тайёрланган тайёр маҳсулотларни, масалан, кийим-кечакларни уч баробар қимматга яна ўзи сотиб олмоқда.

Шу боис, анчадан буён Тожикистон пахтасини мамлакатнинг ўзида тўла қайта ишлаш ва тайёр маҳсулот кўринишида сотиш масаласи муҳокама қилиб келинмоқда, бу борада мақсадли дастурлар қабул қилинади, лекин сезиларли натижалар ҳалигача кўрингани йўқ, дейилади мазкур хабарда.