Япониянинг энг йирик автомобил ишлаб чиқарувчиси “Toyotа Motors” омикрон эпидемияси сабабли 11 заводидаги 21 та ишлаб чиқариш чизиғини вақтинча ёпмоқчи, — деб ёзган “Nikkei Asia” бизнес нашри.

Бундай қарор қабул қилинишига корхона бўлимларида, етказиб берувчилар орасида касаллик юқтирган ишчилар сони ортиб бораётгани сабаб сифатида кўрсатилган.

Ишлаб чиқариш чекланиши 21-24 январь кунлари давом этади.

Мутахассислар фикрича, тизимдаги узилиш туфайли “Toyotа Motors”дан январь ойида 47 мингга яқин машина, жумладан, “Crown” седани ва “Land Cruiser” автомобили ишлаб чиқарилмаслиги мумкин.

“ТАСС” хабарига кўра, Япония бўйлаб янги инфекциянинг кунлик ўсиши суръати рекорд даражага кўтарилди. Шунга қарамай, ўлим ҳолати ва оғир аҳволдаги беморлар сони кўпайиши нисбати паст.

20 январь куни Японияда 42 минг киши инфекция билан зарарлангани аниқланди. Бу бутун эпидемия давридаги энг юқори кўрсаткич.
Эпидемия даврида жами 18,5 мингга яқин Япония фуқароси коронавирус қурбонига айланди.