Республикамиз божхоначилари томонидан жамият осойишталиги, иқтисодий хавфсизлик ва юртдошларимиз саломатлигига зиён етказиши мумкин бўлган қатор товар-моддий бойликларнинг ноқонуний айланмасига қарши самарали кураш олиб борилмоқда. Божхона қўмитаси Ахборот-хизмати билан ҳамкорликда тайёрланган навбатдаги лавҳа шу ҳақида.

Амалдаги тартибларга кўра, республикамизга акциз маркалари билан қадоқланмаган ҳамда рақамли маркировка кодларига эга бўлмаган тамаки маҳсулотларини олиб кириш мумкин эмас. Шунга қарамай, тамаки маҳсулотларини божхона назоратидан четлаб олиб киришга бўлган уринишлар учраб турибди.

Наманган вилояти божхона бошқармаси Контрабандага қарши курашиш бўлими ДХХ ҳамда хуқуқни мухофаза қилувчи бошқа идора вакиллари билан ҳамкорликда вилоят ҳудудида  рақамли маркировка кодларига эга бўлмаган ҳамда акциз маркалари билан қадоқланмаган тамаки маҳсулотларини ноқонуний ташишни аниқлаш бўйича тезкор тадбир ўтказилди.

– Ўтказилган тадбир давомида фуқаро бошқарувидаги “Кобалт” русумли автотранспорт воситаси тўхтатилиб, холислар иштирокида кўздан кечирилганида, транспорт воситаси юкхонаси ва салонида, ҳеч қандай ҳужжатлари бўлмаган умумий қиймати 150 миллион сўмлик 10 минг қути тамаки маҳсулотлари борлиги аниқланди, – деди Божхона қўмитаси Ахборот хизмати бош инспектори Хуршида Мурадова. - Шундан сўнг, тезкор тадбир давом эттирилиб, ушбу фуқаронинг яшаш хонадони холислар иштирокида кўздан кечирилганда, хонадон яшаш хонасидан қиймати 60 миллион сўмлик 3990 қути тамаки маҳсулотлари борлиги маълум бўлди. 

“Тошкент халқаро аэропорти” чегара божхона пости ходимлари томонидан “Пекин-Тошкент” йўналиши бўйича учиб келган хориж фуқаросига тегишли бўлган йўл сумкаси белгиланган тартибда божхона кўригидан ўтказилди. Натижада божхона назоратига белгиланган тартибда тақдим этилмаган, божхона ходимининг оғзаки сўровида маълум қилинмаган, жисмоний шахслар учун божсиз олиб кириш меъёридан ортиқ бўлган жами 480 қути ҳар хил турдаги тамаки махсулотлари борлиги аниқланди.

<iframe width="650" height="420" src="https://www.youtube.com/embed/yh10NdZoSpY" title="Товар-моддий бойликларнинг ноқонуний айланмасига чек қўйилди" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

– Навбатдаги ҳолатда эса “Токио-Тошкент” йўналиши бўйича учиб келган, яшил йўлак орқали ҳаракатланган фуқарога тегишли бўлган йўл сумкалари белгиланган тартибда божхона кўригидан ўтказилди, – деди Х.Мурадова. - Натижада божхона назоратига белгиланган тартибда тақдим этилмаган, божхона ходимининг оғзаки сўровида маълум қилинмаган, жисмоний шахслар учун божсиз олиб кириш меъёридан ортиқ бўлган жами 470 қути ҳар хил турдаги тамаки махсулотлари борлиги аниқланди. 

Самарқанд вилояти божхона бошқармаси Контрабандага қарши курашиш бўлими ходимлари томонидан, алкоголь маҳсулотларини яширин ишлаб чиқарилиши ва айланувини олдини олиш бўйича, Самарқанд туманида тезкор тадбир ҳам ўтказилди.

Амалдаги тартибларга кўра, дори воситалари ва тиббий буюмларни дорихоналардан ташқарида реализация қилганлик учун жавобгарлик белгиланган. Қолаверса, сифати ва божхона расмийлаштирувидан ўтганлигини тасдиқловчи ҳужжатлари бўлмаган, сақлаш ва ташиш қоидаларига риоя қилинмаган тиббий буюмлар ҳам юртдошларимиз саломатлиги учун жиддий зиён етказиши мумкин.

“Ислом Каримов номидаги Тошкент халқаро аэропорти” чегара божхона пости ходимлари томонидан “Шарм эль Шейх-Тошкент” йўналиши бўйича учиб келган, яшил йўлак орқали ҳаракатланган фуқарога тегишли бўлган йўл сумкалари белгиланган тартибда божхона кўригидан ўтказилган. Натижада божхона назоратига белгиланган тартибда тақдим этилмаган, жисмоний шахслар учун божсиз олиб кириш меъёридан ортиқ бўлган қиймати 31 миллион 500 минг сўмлик 8 хил турдаги жами 68 дона дори воситалари борлиги аниқланди. Навбатдаги ҳолат Тошкент вилояти божхона бошқармасининг “Ғишткўприк” чегара божхона пости ходимлари томонидан аниқланди.

Пост орқали қўшни давлатдан юртимизга ўтиш учун пиёда холда кириб келган, қўшни давлат фуқаросининг ҳатти-харакатлари божхоначилар эътиборини тортади, шундан сўнг фуқаро белгиланган тартибда шахсий кўрикдан ўтказилганда оёқларининг болдир қисмига скоч билан ўраб яширилган, божхона назоратига белгиланган тартибда тақдим этилмаган қиймати 2 миллион сўмлик 2 турдаги дори воситалари борлиги аниқланиб, ҳуқуқбузарлик ашёси сифатида вақтинча сақловга олинди.

Ҳозирда юқорида келтирилган барча ҳолатлар юзасидан божхона органлари томонидан суриштирув ҳаракатлари давом этмоқда. 

Б.Худойбердиев, Аслиддин Алижонов (видео), ЎзА