Халқаро шахмат федерацияси ва "Norway Chess" 2026 йилда бўлиб ўтадиган “Total Chess World Championship Tour”нинг илк турнири “Total Chess 2026 Pilot” баҳсларида иштирок этадиган 16 нафар шахматчилар номини эълон қилди.

Классик шахмат, рапид ва блиц йўналишларини жамлаган мазкур баҳслар жорий йил илк марта ташкил этилаётгани билан аҳамиятли.

Жаҳон шахмат тизимида янгича форматда ўтадиган мусобақаларда иштирок этиш учун 16 нафар шахматчига таклифнома йўлланди.

Улар - жаҳон чемпиони Доммаражу Гукеш ва аёллар ўртасидаги жаҳон чемпиони Цзюй Вэньцзюнь, 2025 йилги рапид бўйича жаҳон чемпионати совриндорлари Магнус Карлсен, Владислав Артемев, Аржун Эригаиси, 2025 йилги блиц бўйича жаҳон чемпионати совриндорлари Нодирбек Абдусатторов ва Максим Ваше-Лаграв, ФИДЕ рейтинг бўйича энг кучли 9 нафар шахматчилар Хикару Накамура, Фабиано Каруана, Винсент Каймер, Аниш Гири, Алиреза Фирузжа, Рамешбабу Праггнанандха, Вей И, шунингдек захира мезонлари асосида сараланганлар Уэсли Со, Вишванатан Ананд.

Бундан ташқари, мазкур янгича йўналишдаги чемпионатнинг қолган икки нафар иштирокчиси жорий йилнинг апрель ойида Кипрда ўтадиган ФИДE Номзодлар турнирида аниқланди.

Айтиш лозим, Номзодлар мусобақасининг аёллар ва очиқ мусобақаларида ғолибликка эришган шахматчилар  "Total Chess”да қатнашиш ҳуқуқини қўлга киритади.

Эслатиб ўтамиз, “World Championship Tour 2026 Pilot” турнири жорий йилнинг 3–15 октябрь кунлари ташкил этилади.

Мусобақа ўтадиган мамлакат номи яқин ойларда эълон қилинади.

Т.Рўзиев,

ЎзА